Mega BlockBuster : मेगा ब्लॉकबस्टर या चित्रपटाची चाहते आतुरतेनं वाट पाहत आहेत. बीसीसीआय अध्यक्ष सौरव गांगुलीचं पोस्टर या चित्रपटातून पहिल्यांदा समोर आलं होतं. आता मेगा ब्लॉकबस्टर चित्रपटातून दक्षिणेकडील सिनेसृष्टीतील दिग्गज अभिनेत्री रश्मिका मंदाना आणि टीम इंडियाचा कर्णधार रोहित शर्मा यांचा फर्स्ट लूकही समोर आला आहे. एवढंच नाही तर प्रसिद्ध कॉमेडियन कपिल शर्मानंही या चित्रपटातील त्याचं पोस्टर समोर आणलं आहे. यासोबतच मेगा ब्लॉकबस्टरच्या ट्रेलरची रिलीज डेटही जाहीर करण्यात आली आहे.
रोहित शर्मासोबत रश्मिका
विशेष म्हणजे रश्मिका ही साऊथ सिनेसृष्टीतील सुपरस्टार आहे. रश्मिका तिच्या अप्रतिम अभिनयासाठी आणि सौंदर्यासाठी प्रसिद्ध आहे. नुकतंच तिनं तिच्या अधिकृत इंस्टाग्राम हँडलवर मेगा ब्लॉकबस्टर चित्रपटाचं पोस्टर शेअर केलं आहे. या पोस्टरमध्ये रश्मिका तिच्या नखरा शैलीनं लोकांचं लक्ष वेधून घेताना दिसत आहे. यासोबतच मेगा ब्लॉकबस्टरच्या या फर्स्ट लूक पोस्टरवर तिनं कॅप्शनमध्ये लिहिलं, की फन स्टफ. रश्मिकाच्या या चित्रपटाच्या घोषणेनं चाहत्यांची उत्सुकता खूप वाढली आहे. दुसरीकडं, भारतीय क्रिकेट संघाचा कर्णधार रोहित शर्मा त्याच्या अभिनय पदार्पणासाठी सज्ज झाला आहे. रोहितनं सोशल मीडियावर मेगा ब्लॉकबस्टरचा पहिला लूक पोस्टर देखील उघड केला आहे.
हेही वाचा – जेव्हा टीम इंडियाच्या ड्रेसिंग रुममध्ये गेला होता दाऊद; खेळाडूंसमोर ठेवली होती ‘अशी’ ऑफर!
रोहित शर्मा लवकरच क्रिकेटच्या खेळपट्टीनंतर चित्रपटात दिसणार आहे. खरंतर त्यानं स्वतः त्याच्या इंस्टाग्रामवर एक पोस्ट शेअर करून ही माहिती दिली आहे. पोस्टच्या कॅप्शनमध्ये रोहितनं लिहिलं, की ”थोडासा नर्व्हस झालोय, कारण हे एक प्रकारचं पदार्पण आहे. ओशिम या चित्रपटाची निर्मिती करणार आहे.” या चित्रपटात रोहित महत्त्वाच्या भूमिकेत दिसणार आहे. रोहित शर्मा भारताकडून तिन्ही फॉरमॅटमध्ये क्रिकेट खेळतो आहे. एकदिवसीय क्रिकेटमध्ये त्यानं तीन द्विशतकं झळकावली आहेत. यासोबतच त्याने टी-२० क्रिकेटमध्ये चार शतकं झळकावली आहेत. त्यानं भारतासाठी ४५ कसोटी सामन्यात ३१३७ धावा, २३३ एकदिवसीय सामन्यात ९३७६ धावा केल्या आहेत. त्याचबरोबर १३४ टी-२० सामन्यांमध्ये ३५२० धावा केल्या आहेत.
हेही वाचा – कन्फर्म झालंच..! ‘ब्रह्मास्त्र’ चित्रपटात झळकणार शाहरुख खान; पाहा प्रोमो!
मेगा ब्लॉकबस्टरचा ट्रेलर कधी रिलीज होणार?
रश्मिका मंदाना आणि रोहित शर्मा व्यतिरिक्त प्रसिद्ध कॉमेडियन कपिल शर्माने मेगा ब्लॉकबस्टर चित्रपटातील त्याचे फर्स्ट लूक पोस्टर शेअर केले आहे. या सर्व पोस्टर्ससोबतच मेगा ब्लॉकबस्टरचा ट्रेलरची रिलीज तारीखही जाहीर करण्यात आली आहे. मेगा ब्लॉकबस्टरचा ट्रेलर ४ सप्टेंबर रोजी प्रदर्शित होणार आहे. मात्र, ही फिल्म, वेब सिरीज किंवा टीव्ही जाहिरात आहे की नाही हे आत्ताच निश्चित करता येणार नाही. त्याची संपूर्ण माहिती ४ तारखेला समोर येईल.