Manava Naik Uber cab Incident : अभिनेत्री आणि चित्रपट दिग्दर्शिका मनवा नाईक हिच्याशी मुंबईत एका उबर कॅब ड्रायव्हरने गैरवर्तन केले. एवढेच नाही तर कॅब ड्रायव्हरने तिला धमकीही दिली आहे. मनवाने शनिवारी रात्री घरी जाण्यासाठी वांद्रे कुर्ला कॉम्प्लेक्स येथून उबर कॅब घेतली. यादरम्यान कॅब ड्रायव्हरने तिच्याशी गैरवर्तन केले तसेच मार्गात सिग्नलवर वाहतूक पोलिसाशी वाद घातला. मनवाने तिच्या फेसबुक पोस्टद्वारे ही माहिती दिली आहे. मुंबई पोलीस या घटनेचा तपास करत आहेत.
मनवाने तिच्या फेसबुक पोस्टमध्ये लिहिले की, मी रात्री ८.१५ वाजता वांद्रे कुर्ला कॉम्प्लेक्समधून उबर घेतली. बीकेसी (वांद्रे कुर्ला कॉम्प्लेक्स) येथे उबर ड्रायव्हरने फोनवर बोलणे सुरू केले. ज्यावर मी त्याला फोनवर बोलू नकोस सांगितले. त्यानंतर त्याने बीकेसी सिग्नलही तोडला. वाहतूक पोलिसांनी कॅब ड्रायव्हरला थांबवून कॅबचा फोटो काढला. त्यावर कॅब ड्रायव्हरने वाहतूक पोलिसांशी हुज्जत घालण्यास सुरुवात केली.
हेही वाचा – IPL 2023 बाबत मोठी बातमी..! ‘या’ तारखेला होणार ऑक्शन
तुम्ही गाडीचा फोटो काढला आहे, असे सांगून मनवाने वाहतूक पोलिसांना वाद संपवण्यास सांगितले. आता जाऊ द्या, पण यावर उबर ड्रायव्हरचा राग आला आणि त्याने मनवाशी गैरवर्तन केले आणि म्हटले, की तू ५०० रुपये देणार आहेस का? नंतर ड्रायव्हरने पुढे जाऊन मनवाला धमकावले. थांब तुला दाखवतोच, असे ड्रायव्हरने मनवाला म्हटले. त्यावर तिने कॅब ड्रायव्हरला कॅब पोलीस स्टेशनला नेण्यास सांगितले, मात्र त्याने जिओ गार्डनजवळ अंधारात कॅब थांबवली.
https://www.facebook.com/justmanava/posts/10161962864777437
मनवा आणि कॅब ड्रायव्हरमध्ये वाद सुरूच होता, तेव्हा मनवाने ड्रायव्हरला विचारले की तू काय करणार आहेस, त्यावर तो म्हणाला थांब तुला दाखवतो. मनवाने उबर सिक्युरिटीला फोन केला. कन्याभट्टी रोडवरील प्रियदर्शनी पार्कपर्यंत ड्रायव्हरने कॅबचा वेग वाढवला आणि नंतर कोणालातरी कॉल केला. त्यानंतर मनवाने आरडाओरड करण्यास सुरुवात केली. तिचा आवाज ऐकून दोन दुचाकीस्वार आणि एक रिक्षाचालकाने उबरला घेराव घातला आणि मनवाला कारमधून बाहेर काढले. मनवा सुरक्षित आहे, मात्र या घटनेने ती घाबरली आहे. त्यांच्या पोस्टवर मुंबईचे सहपोलीस आयुक्त विश्वास नांगरे पाटील यांनी त्यांना आश्वासन दिले आणि लिहिले, ‘मनवा जी, आम्ही या गंभीर घटनेची दखल घेतली आहे. DCP झोन ८ यावर काम करत असून लवकरात लवकर दोषीला अटक करतील.” त्याबद्दल अभिनेत्रीने विश्वास नांगरे पाटील यांचे आभार मानले.