Main Atal Hoon First Look : पंकज त्रिपाठी स्टारर ‘मैं अटल हूं’ या चित्रपटाचे मोशन पोस्टर रिलीज झाले आहे. पोस्टरमध्ये पंकज माजी पंतप्रधान अटलबिहारी वाजपेयी यांच्या गेटअपमध्ये दिसत आहेत. चाहते त्याच्या लूकचे खूप कौतुक करत आहेत. पोस्टर पाहता, या गेटअपमध्ये तयार होण्यासाठी पंकजने तासनतास मेकअपचा प्रयत्न केल्याचे दिसते. त्याला या गेटअपमध्ये आणण्यासाठी मेकअप आणि प्रोस्थेटिक्स तज्ञांनी खूप मेहनत घेतली आहे. फर्स्ट लूक समोर आल्यापासून अटलचा हा लूक पाहण्यासाठी चाहते खूप उत्सुक आहेत.
अटलजींच्या भूमिकेबद्दल पंकज म्हणाला…
अटलबिहारी वाजपेयी यांच्या जयंतीनिमित्त पोस्ट शेअर करताना पंकजने लिहिले, ”ना कुठेही डगमगले नाही, ना कुठेही डोके झुकवले, मी एक अनोखी शक्ती आहे, मी अटल आहे – पंडित धीरेंद्र त्रिपाठी.” पंकजने पुढे लिहिले, ”मला हे अद्वितीय व्यक्तिमत्त्व पडद्यावर व्यक्त करण्याची संधी मिळाली आहे. या संधीसाठी मी खूप भावनिक आणि कृतज्ञ आहे. मला माहीत आहे की अटलजींचे व्यक्तिमत्व पडद्यावर साकार करण्यासाठी माझ्या व्यक्तिमत्त्वावर संयमाने काम करणे आवश्यक आहे. उत्साह आणि मनोबलाच्या जोरावर मी माझ्या नव्या भूमिकेला न्याय देऊ शकेन, असा मला ठाम विश्वास आहे.” हा चित्रपट डिसेंबर २०२३ रोजी थिएटरमध्ये प्रदर्शित होणार आहे.
हेही वाचा – IND Vs BAN : स्वस्तात आऊट झाल्यावर विराटचं भांडण..! मध्ये आला ‘हा’ खेळाडू; पाहा Video
रवी जाधवांचं दिग्दर्शन
राष्ट्रीय पुरस्कार विजेते आणि मराठमोळे दिग्दर्शक रवी जाधव ‘मैं अटल हूं’चे दिग्दर्शन करत आहेत. उत्कर्ष नैथानी यांनी हा चित्रपट लिहिला आहे. याचे संगीत सलीम-सुलेमान देणार असून समीरने चित्रपटाची गाणी लिहिली आहेत. या चित्रपटासाठी सोनू निगमही आपला आवाज देणार आहे. या वर्षी २८ जून रोजी निर्मात्यांनी बायोपिकची घोषणा केली होती. तेव्हापासून या चित्रपटात अटलबिहारी वाजपेयी यांची भूमिका कोण साकारणार याची चाहत्यांना उत्सुकता होती. मात्र, आता या प्रकरणावरून पडदा उचलण्यात आला आहे.